ye aarzu thi use aaina banate hum

ye aarzū thī use aa.ina banāte ham

aur ā.īne kī hifāzat meñ TuuT jaate ham

tamām umr bhaTakte rahe ye kahte hue

ki ghar banāte sajāte use bulāte ham

har aadmī vahāñ masrūf qahqahoñ meñ thā

ye āñsuoñ kī kahānī kise sunāte ham

bigāḌe baiThe the taqdīr apne hāthoñ se

hatheliyoñ kī lakīreñ kise dikhāte ham

ḳhudā ne itnā karam aur kar diyā hotā

ki jis ne zaḳhm diye us ko bhuul jaate ham

kuchh is sabab se bhī ye zaḳhm lā-davā Thahre

har ek shaḳhs kā ehsāñ nahīñ uThāte ham

tū apne ġham se hī ḳhālī kahāñ hai ai 'tāriq'

jo tere paas kabhī aa ke baiTh jaate ham

ye aarzu thi use aaina banate hum

aur aaine ki hifazat mein TuT jate hum

tamam umr bhaTakte rahe ye kahte hue

ki ghar banate sajate use bulate hum

har aadmi wahan masruf qahqahon mein tha

ye aansuon ki kahani kise sunate hum

bigaDe baiThe the taqdir apne hathon se

hatheliyon ki lakiren kise dikhate hum

KHuda ne itna karam aur kar diya hota

ki jis ne zaKHm diye us ko bhul jate hum

kuchh is sabab se bhi ye zaKHm la-dawa Thahre

har ek shaKHs ka ehsan nahin uThate hum

tu apne gham se hi KHali kahan hai ai 'tariq'

jo tere pas kabhi aa ke baiTh jate hum