tumhaari yaad mein hum jashn-e-gham manaen bhi

tumhārī yaad meñ ham jashn-e-ġham manā.eñ bhī

kisī tarah se magar tum ko yaad aa.eñ bhī

chhalak hī paḌte haiñ ḳhud hī gulāb āñkhoñ ke

vo paas aa.eñ to ye dāstāñ sunā.īñ bhī

har ek lamha yahī bekalī sī hai dil meñ

ki un ko yaad kareñ un ko bhuul jaa.eñ bhī

javān gehūñ ke khetoñ ko dekh kar ro deñ

vo laḌkiyāñ ki jinheñ bhuul baiThīñ maa.eñ bhī

tamām umr yūñhī ratjagoñ se kyā hāsil

unheñ bhulā.eñ zarā niiñd ko bulā.eñ bhī

sukūn miltā hai jaltī huī dopahroñ meñ

banī haiñ marham-e-dil dhuup kī shuā.eñ bhī

ravā-ravī meñ hai har ek sohbat-e-yārāñ

mileñ sakūñ se to qisse tire sunā.eñ bhī

vo jin ke zikr se 'nāhīd' zindagī hai hasīñ

vo log aa.eñ to āñkhoñ pe ham biThā.eñ bhī

tumhaari yaad mein hum jashn-e-gham manaen bhi

kisi tarah se magar tum ko yaad aaen bhi

chhalak hi paDte hain KHud hi gulab aankhon ke

wo pas aaen to ye dastan sunain bhi

har ek lamha yahi bekali si hai dil mein

ki un ko yaad karen un ko bhul jaen bhi

jawan gehun ke kheton ko dekh kar ro den

wo laDkiyan ki jinhen bhul baiThin maen bhi

tamam umr yunhi ratjagon se kya hasil

unhen bhulaen zara nind ko bulaen bhi

sukun milta hai jalti hui dopahron mein

bani hain marham-e-dil dhup ki shuaen bhi

rawa-rawi mein hai har ek sohbat-e-yaran

milen sakun se to qisse tere sunaen bhi

wo jin ke zikr se 'nahid' zindagi hai hasin

wo log aaen to aankhon pe hum biThaen bhi