ojhal hui nazar se be-baal-o-par gai hai

ojhal huī nazar se be-bāl-o-par ga.ī hai

lafzoñ kī be-karānī bastoñ meñ bhar ga.ī hai

dīvār-e-dil pe ab tak ham dekhte rahe haiñ

tasvīr kis kī laTkī kis kī utar ga.ī hai

us kī galī meñ ham par patthar baras paḌe the

jaisā guzar huā thā vaisī guzar ga.ī hai

jab DhūñDte rahe the utnī ḳhabar nahīñ thī

ham meñ kidhar se aa.ī duniyā kidhar ga.ī hai

bhāgī thī ik hasīna bāġhoñ ke shor-o-ġhul se

us kī balā javānī bachchoñ se Dar ga.ī hai

hai chal-chalāv kaisā kaisā hai ānā-jānā

vo shaam jā chukī thī ab vo sahar ga.ī hai

siine ke biich 'sāqib' aisā hai marnā jiinā

ik yaad jī uThī thī ik yaad mar ga.ī hai

ojhal hui nazar se be-baal-o-par gai hai

lafzon ki be-karani baston mein bhar gai hai

diwar-e-dil pe ab tak hum dekhte rahe hain

taswir kis ki laTki kis ki utar gai hai

us ki gali mein hum par patthar baras paDe the

jaisa guzar hua tha waisi guzar gai hai

jab DhunDte rahe the utni KHabar nahin thi

hum mein kidhar se aai duniya kidhar gai hai

bhagi thi ek hasina baghon ke shor-o-ghul se

us ki bala jawani bachchon se Dar gai hai

hai chal-chalaw kaisa kaisa hai aana-jaana

wo sham ja chuki thi ab wo sahar gai hai

sine ke bich 'saqib' aisa hai marna jina

ek yaad ji uThi thi ek yaad mar gai hai