log tanhai ka kis darja gila karte hain

log tanhā.ī kā kis darja gilā karte haiñ

aur fankār to tanhā hī rahā karte haiñ

vo tabassum hai ki 'ġhālib' kī tarah-dār ġhazal

der tak us kī balāġhat ko paḌhā karte haiñ

koī jaadū koī jalva koī mastī koī mauj

ham inhīñ chand sahāroñ pe jiyā karte haiñ

din pe yāroñ ko añdhere kā gumāñ hotā hai

ham añdhere meñ kiran DhūñDh liyā karte haiñ

bastiyāñ kuchh huiiñ vīrān to mātam kaisā

kuchh ḳharābe bhī to ābād huā karte haiñ

sunñe vāloñ kī hai taufīq suneñ yā na suneñ

baat kahne kī jo hai ham to kahā karte haiñ

sāhil o bahr ke aa.iin salāmat na rahe

ab to sāhil se bhī tūfān uThā karte haiñ

log bātoñ meñ bahā dete haiñ is daur kā dard

aur ash.ār meñ ham Dhaal liyā karte haiñ

log tanhai ka kis darja gila karte hain

aur fankar to tanha hi raha karte hain

wo tabassum hai ki 'ghaalib' ki tarah-dar ghazal

der tak us ki balaghat ko paDha karte hain

koi jadu koi jalwa koi masti koi mauj

hum inhin chand sahaaron pe jiya karte hain

din pe yaron ko andhere ka guman hota hai

hum andhere mein kiran DhunDh liya karte hain

bastiyan kuchh huin viran to matam kaisa

kuchh KHarabe bhi to aabaad hua karte hain

sunne walon ki hai taufiq sunen ya na sunen

baat kahne ki jo hai hum to kaha karte hain

sahil o bahr ke aain salamat na rahe

ab to sahil se bhi tufan uTha karte hain

log baaton mein baha dete hain is daur ka dard

aur ashaar mein hum Dhaal liya karte hain