kisi ke hijr mein yun TuT kar roya nahin karte

kisī ke hijr meñ yuuñ TuuT kar royā nahīñ karte

ye apnā rañj hai aur rañj kā charchā nahīñ karte

judā.ī kī rutoñ meñ sūrateñ dhuñdlāne lagtī haiñ

so aise mausamoñ meñ aa.ina dekhā nahīñ karte

ziyāda se ziyāda dil bichhā dete haiñ raste meñ

magar jis ne bichhaḌnā ho use rokā nahīñ karte

hamesha ik masāfat ghūmtī rahtī hai paañv meñ

safar ke ba.ad bhī kuchh log ghar pahuñchā nahīñ karte

tanī rassī pe dariyā paar utarnā hī muqaddar ho

to phir sīnoñ meñ ġharqābī kā Dar rakkhā nahīñ karte

hameñ rusvā kiyā is niiñd meñ chalne kī aadat ne

vagarna jāgte meñ ham kabhī aisā nahīñ karte

'hasan' jab laḌkhaḌā kar apne hī paañv pe girnā ho

to phir eḌī pe itnī der tak ghūmā nahīñ karte

kisi ke hijr mein yun TuT kar roya nahin karte

ye apna ranj hai aur ranj ka charcha nahin karte

judai ki ruton mein suraten dhundlane lagti hain

so aise mausamon mein aaina dekha nahin karte

ziyaada se ziyaada dil bichha dete hain raste mein

magar jis ne bichhaDna ho use roka nahin karte

hamesha ek masafat ghumti rahti hai panw mein

safar ke baad bhi kuchh log ghar pahuncha nahin karte

tani rassi pe dariya par utarna hi muqaddar ho

to phir sinon mein gharqabi ka Dar rakkha nahin karte

hamein ruswa kiya is nind mein chalne ki aadat ne

wagarna jagte mein hum kabhi aisa nahin karte

'hasan' jab laDkhaDa kar apne hi panw pe girna ho

to phir eDi pe itni der tak ghuma nahin karte