kiran to ghar ke andar aa gai thi

kiran to ghar ke andar aa ga.ī thī

sunahrī dhuup kyuuñ kajlā ga.ī thī

kuchh aisī be-hisī se pesh aayā

ki merī be-kasī sharmā ga.ī thī

chhanākā to mire andar huā thā

tirī āvāz kyuuñ bharrā ga.ī thī

vahī rishte vahī naate vahī ġham

badan se ruuh tak uktā ga.ī thī

janam pā kar janam paayā na maiñ ne

mujhe lafzoñ kī nāgan khā ga.ī thī

thakan meñ Dhal gayā lahja kisī kā

mirī ḳhvāhish ko bhī niiñd aa ga.ī thī

vo chingārī huā bāñheñ bikhere

lipaT kar mujh ko bhī jhulsā ga.ī thī

vo kab andar thā jo bāhar na aayā

'najīb' ik baat kyā samjhā ga.ī thī

kiran to ghar ke andar aa gai thi

sunahri dhup kyun kajla gai thi

kuchh aisi be-hisi se pesh aaya

ki meri be-kasi sharma gai thi

chhanaka to mere andar hua tha

teri aawaz kyun bharra gai thi

wahi rishte wahi nate wahi gham

badan se ruh tak ukta gai thi

janam pa kar janam paya na main ne

mujhe lafzon ki nagan kha gai thi

thakan mein Dhal gaya lahja kisi ka

meri KHwahish ko bhi nind aa gai thi

wo chingari hua banhen bikhere

lipaT kar mujh ko bhi jhulsa gai thi

wo kab andar tha jo bahar na aaya

'najib' ek baat kya samjha gai thi