kam na thi sahra se kuchh bhi KHana-virani meri

kam na thī sahrā se kuchh bhī ḳhāna-vīrānī mirī

maiñ nikal aayā kahāñ ai vaa.e nādānī mirī

kyā banā.ūñ maiñ kisī ko rahbar-e-mulk-e-adam

ai ḳhizr ye sar-zamīñ hai jānī-pahchānī mirī

jaan o dil par jitne sadme haiñ isī ke dam se haiñ

zindagī hai fil-haqīqat dushman-e-jānī mirī

ibtidā-e-ishq-e-gesū meñ na thiiñ ye uljhaneñ

baḌhte baḌhte baḌh ga.ī āḳhir pareshānī mirī

dasht-e-hastī meñ ravāñ huuñ mudda.ā kuchh bhī nahīñ

kab huī mohtāj-e-lailā qais-sāmānī mirī

aur tū vāqif nahīñ koī dayār-e-ishq meñ

hai junūñ shaidā mirā vahshat hai dīvānī mirī

bāġh-e-duniyā meñ yūñhī ro hañs ke kāTūñ chaar din

zindagī hai shabnam o gul kī tarah faanī mirī

bād-e-tark-e-ārzū baiThā huuñ kaisā mutma.in

ho ga.ī āsāñ har ik mushkil ba-āsānī mirī

haañ ḳhudā-lagtī zarā kah de tū ai husn-e-sanam

āshiqī auroñ kī achchhī yā ki hairānī mirī

laḳht-e-dil khāne ko hai ḳhūn-e-jigar piine ko hai

mezbān-e-dahr ne kī ḳhuub mehmānī mirī

naġhma-zan sahrā meñ ho jis tarah koī andalīb

yuuñ hai ai 'mahrūm' sarhad meñ ġhazal-ḳhvānī mirī

kam na thi sahra se kuchh bhi KHana-virani meri

main nikal aaya kahan ai wae nadani meri

kya banaun main kisi ko rahbar-e-mulk-e-adam

ai KHizr ye sar-zamin hai jaani-pahchani meri

jaan o dil par jitne sadme hain isi ke dam se hain

zindagi hai fil-haqiqat dushman-e-jaani meri

ibtida-e-ishq-e-gesu mein na thin ye uljhanen

baDhte baDhte baDh gai aaKHir pareshani meri

dasht-e-hasti mein rawan hun muddaa kuchh bhi nahin

kab hui mohtaj-e-laila qais-samani meri

aur tu waqif nahin koi dayar-e-ishq mein

hai junun shaida mera wahshat hai diwani meri

bagh-e-duniya mein yunhi ro hans ke kaTun chaar din

zindagi hai shabnam o gul ki tarah fani meri

baad-e-tark-e-arzu baiTha hun kaisa mutmain

ho gai aasan har ek mushkil ba-asani meri

han KHuda-lagti zara kah de tu ai husn-e-sanam

aashiqi auron ki achchhi ya ki hairani meri

laKHt-e-dil khane ko hai KHun-e-jigar pine ko hai

mezban-e-dahr ne ki KHub mehmani meri

naghma-zan sahra mein ho jis tarah koi andalib

yun hai ai 'mahrum' sarhad mein ghazal-KHwani meri