jo sang ho ke mulaem hai sadgi ki tarah

jo sañg ho ke mulā.em hai sādgī kī tarah

pighal rahā hai mire dil meñ chāñdnī kī tarah

mujhe pukāro to dīvār huuñ suno to sadā

maiñ gūñjtā huuñ fazāoñ meñ ḳhāmushī kī tarah

maiñ us ko nuur kā paikar kahūñ ki jān-e-ḳhayāl

jo mere dil pe utartā hai shā.irī kī tarah

kisī kī yaad ne mahkā diyā hai zaḳhm-e-talab

sabā ke haath se maslī huī kalī kī tarah

thakā huā huuñ kisī saa.e kī talāsh meñ huuñ

bichhaḌ gayā huuñ sitāroñ se raushnī kī tarah

maiñ apne karb meñ ġhaltāñ vo apne kaif meñ gum

hai is kī jiit bhī merī shikast hī kī tarah

ḳhizāñ ke zahr kā tiryāk agar nahīñ yaaro

guloñ kī baat hai be-vaqt rāgnī kī tarah

jo sang ho ke mulaem hai sadgi ki tarah

pighal raha hai mere dil mein chandni ki tarah

mujhe pukaro to diwar hun suno to sada

main gunjta hun fazaon mein KHamushi ki tarah

main us ko nur ka paikar kahun ki jaan-e-KHayal

jo mere dil pe utarta hai shairi ki tarah

kisi ki yaad ne mahka diya hai zaKHm-e-talab

saba ke hath se masli hui kali ki tarah

thaka hua hun kisi sae ki talash mein hun

bichhaD gaya hun sitaron se raushni ki tarah

main apne karb mein ghaltan wo apne kaif mein gum

hai is ki jit bhi meri shikast hi ki tarah

KHizan ke zahr ka tiryak agar nahin yaro

gulon ki baat hai be-waqt ragni ki tarah