hazar sahra the raste mein yar kya karta

hazār sahrā the raste meñ yaar kyā kartā

jo chal paḌā thā to fikr-e-ġhubār kyā kartā

kabhī jo Thiik se ḳhud ko samajh nahīñ paayā

vo dūsroñ pe bhalā e'tibār kyā kartā

chalo ye maanā ki iz.hār bhī zarūrī hai

so ek baar kiyā, baar baar kyā kartā

isī liye to dar-e-ā.ina bhī vā na kiyā

jo so rahe haiñ unheñ hoshiyār kyā kartā

vo apne ḳhvāb kī tafsīr ḳhud na kar paayā

jahān bhar pe use āshkār kyā kartā

agar vo karne pe aatā to kuchh bhī kar jaatā

ye soch mat ki akelā sharār kyā kartā

sivā.e ye ki vo apne bhī zaḳhm taaza kare

mire ġhamoñ pe mirā ġham-gusār kyā kartā

bas ek phuul kī ḳhātir bahār māñgī thī

rutoñ se varna maiñ qaul-o-qarār kyā kartā

mirā lahū hī kahānī kā rañg thā 'javvād'

kahānī-kār use rañg-dār kyā kartā

hazar sahra the raste mein yar kya karta

jo chal paDa tha to fikr-e-ghubar kya karta

kabhi jo Thik se KHud ko samajh nahin paya

wo dusron pe bhala e'tibar kya karta

chalo ye mana ki izhaar bhi zaruri hai

so ek bar kiya, bar bar kya karta

isi liye to dar-e-aina bhi wa na kiya

jo so rahe hain unhen hoshiyar kya karta

wo apne KHwab ki tafsir KHud na kar paya

jahan bhar pe use aashkar kya karta

agar wo karne pe aata to kuchh bhi kar jata

ye soch mat ki akela sharar kya karta

siwae ye ki wo apne bhi zaKHm taza kare

mere ghamon pe mera gham-gusar kya karta

bas ek phul ki KHatir bahaar mangi thi

ruton se warna main qaul-o-qarar kya karta

mera lahu hi kahani ka rang tha 'jawwad'

kahani-kar use rang-dar kya karta