had-e-nazar se mera aasman hai poshida

had-e-nazar se mirā āsmāñ hai poshīda

ḳhayāl-o-ḳhvāb meñ lipTā jahāñ hai poshīda

chalā maiñ jānib-e-manzil to ye huā ma.alūm

yaqīñ gumān meñ gum hai gumāñ hai poshīda

palak pe aa ke sitāre ne dāstāñ kah dī

jo dil meñ aag hai us kā dhuāñ hai poshīda

ufuq se tā-ba-ufuq hai sarāb phailā huā

aur is sarāb meñ saarā jahāñ hai poshīda

sitāra kyā mujhe aflāk kī ḳhabar degā?

nazar se us kī to merā jahāñ hai poshīda

tū ḳhud hai ḳhār-o-zabūñ hirs-o-āz-e-duniyā meñ

khulegā tujh pe kahāñ jo jahāñ hai poshīda

maiñ aañkh khol ke taktā huuñ duur tak 'anvar'

ki DhūñD luuñ jo mirā āshiyāñ hai poshīda

had-e-nazar se mera aasman hai poshida

KHayal-o-KHwab mein lipTa jahan hai poshida

chala main jaanib-e-manzil to ye hua malum

yaqin guman mein gum hai guman hai poshida

palak pe aa ke sitare ne dastan kah di

jo dil mein aag hai us ka dhuan hai poshida

ufuq se ta-ba-ufuq hai sarab phaila hua

aur is sarab mein sara jahan hai poshida

sitara kya mujhe aflak ki KHabar dega?

nazar se us ki to mera jahan hai poshida

tu KHud hai KHar-o-zabun hirs-o-az-e-duniya mein

khulega tujh pe kahan jo jahan hai poshida

main aankh khol ke takta hun dur tak 'anwar'

ki DhunD lun jo mera aashiyan hai poshida