ba-zom-e-KHud kahin KHud se wara na ho jaun

ba-zom-e-ḳhud kahīñ ḳhud se varā na ho jā.ūñ

ḳhudā-na-ḳhvāsta maiñ bhī ḳhudā na ho jā.ūñ

bas ek dhyān kī maiñ uñglī thaam rakhī hai

ki bhiiḌ meñ kahīñ ḳhud se judā na ho jā.ūñ

ye sochtā huuñ kisī dil meñ ghar karūñ maiñ bhī

aur us se pahle yahāñ be-Thikāna ho jā.ūñ

ye jī meñ aatā hai mere ki raftagāñ kī tarah

maiñ aaj mulk-e-adam ko ravāna ho jā.ūñ

sab ahl-e-dahr mujhe DhūñDte na rah jaa.eñ

maiñ apnī zaat hī meñ lāpatā na ho jā.ūñ

koī to ho jo mujhe zindagī hī meñ paa.e

kisī ke haath meñ aayā ḳhazāna ho jā.ūñ

jo ho sake to mire jīte-jī hī qadr karo

mabādā maiñ koī guzrā zamāna ho jā.ūñ

bas ek tajraba mere liye bahut hai dilā

ik aur ishq meñ phir mubtalā na ho jā.ūñ

maiñ ik charāġh-e-sar-e-rahguzār huuñ 'sāhir'

havā ke saath bil-āḳhir havā na ho jā.ūñ

ba-zom-e-KHud kahin KHud se wara na ho jaun

KHuda-na-KHwasta main bhi KHuda na ho jaun

bas ek dhyan ki main ungli tham rakhi hai

ki bhiD mein kahin KHud se juda na ho jaun

ye sochta hun kisi dil mein ghar karun main bhi

aur us se pahle yahan be-Thikana ho jaun

ye ji mein aata hai mere ki raftagan ki tarah

main aaj mulk-e-adam ko rawana ho jaun

sab ahl-e-dahr mujhe DhunDte na rah jaen

main apni zat hi mein lapata na ho jaun

koi to ho jo mujhe zindagi hi mein pae

kisi ke hath mein aaya KHazana ho jaun

jo ho sake to mere jite-ji hi qadr karo

mabaada main koi guzra zamana ho jaun

bas ek tajraba mere liye bahut hai dila

ek aur ishq mein phir mubtala na ho jaun

main ek charagh-e-sar-e-rahguzar hun 'sahir'

hawa ke sath bil-aKHir hawa na ho jaun