ai meri zat ke sukun aa ja

ai mirī zaat ke sukūñ aa jā

tham na jaa.e kahīñ junūñ aa jā

raat se ek soch meñ gum huuñ

kis bahāne tujhe kahūñ aa jā

haath jis moḌ par chhuḌāyā thā

maiñ vahīñ par huuñ sar nigūñ aa jā

yaad hai surḳh phuul kā tohfa?

ho chalā vo bhī nīl-gūñ aa jā

chāñd tāroñ se kab talak āḳhir

terī bāteñ kiyā karūñ aa jā

apnī vahshat se ḳhauf aatā hai

kab se vīrāñ hai andarūñ aa jā

is se pahle ki maiñ aziyyat meñ

apnī āñkhoñ ko noch luuñ aa jā

dekh! maiñ yaad kar rahī huuñ tujhe

phir maiñ ye bhī na kar sakūñ aa jā

ai meri zat ke sukun aa ja

tham na jae kahin junun aa ja

raat se ek soch mein gum hun

kis bahane tujhe kahun aa ja

hath jis moD par chhuDaya tha

main wahin par hun sar nigun aa ja

yaad hai surKH phul ka tohfa?

ho chala wo bhi nil-gun aa ja

chand taron se kab talak aaKHir

teri baaten kiya karun aa ja

apni wahshat se KHauf aata hai

kab se viran hai andarun aa ja

is se pahle ki main aziyyat mein

apni aankhon ko noch lun aa ja

dekh! main yaad kar rahi hun tujhe

phir main ye bhi na kar sakun aa ja