ahl-e-dil ne ishq mein chaha tha jaisa ho gaya

ahl-e-dil ne ishq meñ chāhā thā jaisā ho gayā

aur phir kuchh shaan se aisī ki sochā ho gayā

aib apnī aañkh kā yā faiz terā kyā kahūñ

ġhair kī sūrat pe mujh ko terā dhokā ho gayā

tujh se ham-āhañg thā utnā kashish jaatī rahī

maiñ tirā ham-qāfiya thā aib-e-ītā ho gayā

yaad ne aa kar yakāyak parda khīñchā duur tak

maiñ bharī mahfil meñ baiThā thā ki tanhā ho gayā

kashtī-e-sabr-o-tahammul merī tūfānī huī

raat ko terā badan jab mauj-e-dariyā ho gayā

kyā huā gar tere hoñToñ ne masīhā.ī na kī

terī āñkheñ dekh kar bīmār achchhā ho gayā

ishq miTTī kā ajab thā mujh ko bachpan meñ 'salīm'

khel meñ kyā sochtā maiñ jism mailā ho gayā

ahl-e-dil ne ishq mein chaha tha jaisa ho gaya

aur phir kuchh shan se aisi ki socha ho gaya

aib apni aankh ka ya faiz tera kya kahun

ghair ki surat pe mujh ko tera dhoka ho gaya

tujh se ham-ahang tha utna kashish jati rahi

main tera ham-qafiya tha aib-e-ita ho gaya

yaad ne aa kar yakayak parda khincha dur tak

main bhari mahfil mein baiTha tha ki tanha ho gaya

kashti-e-sabr-o-tahammul meri tufani hui

raat ko tera badan jab mauj-e-dariya ho gaya

kya hua gar tere honTon ne masihai na ki

teri aankhen dekh kar bimar achchha ho gaya

ishq miTTi ka ajab tha mujh ko bachpan mein 'salim'

khel mein kya sochta main jism maila ho gaya