jaan uski adaon par nikalti hi rahegi

jaan us kī adāoñ par nikaltī hī rahegī

ye chheḌ jo chaltī hai so chaltī hī rahegī

zālim kī to aadat hai satātā hī rahegā

apnī bhī tabī.at hai bahaltī hī rahegī

dil rashk-e-adū se hai sipand-e-sar-e-ātish

ye sham.a tirī bazm meñ jaltī hī rahegī

ġhamza tirā dhokā yūñhī detā hī rahegā

talvār tire kūche meñ chaltī hī rahegī

ik aan meñ vo kuchh haiñ to ik aan meñ kuchh haiñ

karvaT mirī taqdīr badaltī hī rahegī

andāz meñ shoḳhī meñ sharārat meñ hayā meñ

vaañ ek na ik baat nikaltī hī rahegī

'vahshat' ko rahā uns jo yuuñ fann-e-suḳhan se

ye shāḳh-e-hunar phūltī-phaltī hī rahegī

jaan us ki adaon par nikalti hi rahegi

ye chheD jo chalti hai so chalti hi rahegi

zalim ki to aadat hai satata hi rahega

apni bhi tabiat hai bahalti hi rahegi

dil rashk-e-adu se hai sipand-e-sar-e-atish

ye shama teri bazm mein jalti hi rahegi

ghamza tera dhoka yunhi deta hi rahega

talwar tere kuche mein chalti hi rahegi

ek aan mein wo kuchh hain to ek aan mein kuchh hain

karwaT meri taqdir badalti hi rahegi

andaz mein shoKHi mein shararat mein haya mein

wan ek na ek baat nikalti hi rahegi

'wahshat' ko raha uns jo yun fann-e-suKHan se

ye shaKH-e-hunar phulti-phalti hi rahegi