ishq mein humse mashaqqat nahin karni aai

'ishq meñ ham se mashaqqat nahīñ karnī aa.ī

jaise karte haiñ mohabbat nahīñ karnī aa.ī

aap ke haath pe ham haath bhī rakhte kaise

ham se to apnī hī bai'at nahīñ karnī aa.ī

gardish-e-vaqt meñ Thokar nahīñ khaa.ī jis ne

us qabīle ko baġhāvat nahīñ karnī aa.ī

ham tire saa.e meñ kuchh der Thaharte kaise

ham ko jab dhuup se vahshat nahīñ karnī aa.ī

ham se nā-ahloñ ko is kārgah-e-hastī meñ

zinda rahne kī bhī sūrat nahīñ karnī aa.ī

'ishq mein hum se mashaqqat nahin karni aai

jaise karte hain mohabbat nahin karni aai

aap ke hath pe hum hath bhi rakhte kaise

hum se to apni hi bai'at nahin karni aai

gardish-e-waqt mein Thokar nahin khai jis ne

us qabile ko baghawat nahin karni aai

hum tere sae mein kuchh der Thaharte kaise

hum ko jab dhup se wahshat nahin karni aai

hum se na-ahlon ko is kargah-e-hasti mein

zinda rahne ki bhi surat nahin karni aai