chale hae dam bhar ko mehman ho kar

chale haa.e dam bhar ko mehmān ho kar

mujhe maar Daalā mirī jaan ho kar

ye sūrat huī hai ki ā.īna pahroñ

mire muñh ko taktā hai hairān ho kar

javāñ hote hī le uḌā husn tum ko

parī ho ga.e tum to insān ho kar

bigaḌne meñ zulf-e-rasā kī ban aa.ī

liye ruḳh ke bose pareshān ho kar

karam meñ maza hai sitam meñ adā hai

maiñ raazī huuñ jo tujh ko āsān ho kar

judā sar huā par hue ham na halke

rahī teġh gardan par ehsān ho kar

na āḳhir bachā parda-e-rāz-e-dushman

huā chaak merā garebān ho kar

havās aate jaate rahe roz-e-vāda

tirī yaad ho kar mirī jaan ho kar

butoñ ko jagah dil meñ dete ho tauba

'jalīl' aisī bāteñ musalmān ho kar

chale hae dam bhar ko mehman ho kar

mujhe mar Dala meri jaan ho kar

ye surat hui hai ki aaina pahron

mere munh ko takta hai hairan ho kar

jawan hote hi le uDa husn tum ko

pari ho gae tum to insan ho kar

bigaDne mein zulf-e-rasa ki ban aai

liye ruKH ke bose pareshan ho kar

karam mein maza hai sitam mein ada hai

main raazi hun jo tujh ko aasan ho kar

juda sar hua par hue hum na halke

rahi tegh gardan par ehsan ho kar

na aaKHir bacha parda-e-raaz-e-dushman

hua chaak mera gareban ho kar

hawas aate jate rahe roz-e-wada

teri yaad ho kar meri jaan ho kar

buton ko jagah dil mein dete ho tauba

'jalil' aisi baaten musalman ho kar