gai jo tifli to phir aalam-e-shabab aaya

ga.ī jo tiflī to phir ālam-e-shabāb aayā

gayā shabāb to ab mausam-e-ḳhizāb aayā

maiñ shauq-e-vasl meñ kyā rail par shitāb aayā

ki sub.h hind meñ thā shaam pañj-āb aayā

kaTā thā roz-e-musībat ḳhudā ḳhudā kar ke

ye raat aa.ī ki sar pe mire azaab aayā

kahāñ hai dil ko abas DhūñDhte ho pahlū meñ

tumhāre kūche meñ muddat se us ko daab aayā

kisī kī teġh-e-taġhāful kā maiñ vo kushta huuñ

na jaagā neze pe sau baar āftāb aayā

nazar paḌī na mirī ro.ab-e-husn se ruḳh par

agarche sāmne mere vo be-naqāb aayā

hamesha sūrat-e-anjum khulī rahīñ āñkheñ

firāq-e-yār meñ kis roz mujh ko ḳhvāb aayā

huā yaqīñ ki zamīñ par hai aaj chāñd-gahan

vo maah chehre pe jab Daal kar naqāb aayā

hue jo dīda-e-girya se apne ashk ravāñ

gumāñ huā ki barastā huā sahāb aayā

banā tasavvur-e-lailā ba-sūrat-e-tasvīr

kabhī jo qais kī āñkhoñ meñ shab ko ḳhvāb aayā

vo zūd-ranj hai us ko na chheḌnā 'ra.anā'

maloge haath agar bar-sar-e-itāb aayā

gai jo tifli to phir aalam-e-shabab aaya

gaya shabab to ab mausam-e-KHizab aaya

main shauq-e-wasl mein kya rail par shitab aaya

ki subh hind mein tha sham panj-ab aaya

kaTa tha roz-e-musibat KHuda KHuda kar ke

ye raat aai ki sar pe mere azab aaya

kahan hai dil ko abas DhunDhte ho pahlu mein

tumhaare kuche mein muddat se us ko dab aaya

kisi ki tegh-e-taghaful ka main wo kushta hun

na jaga neze pe sau bar aaftab aaya

nazar paDi na meri roab-e-husn se ruKH par

agarche samne mere wo be-naqab aaya

hamesha surat-e-anjum khuli rahin aankhen

firaq-e-yar mein kis roz mujh ko KHwab aaya

hua yaqin ki zamin par hai aaj chand-gahan

wo mah chehre pe jab Dal kar naqab aaya

hue jo dida-e-girya se apne ashk rawan

guman hua ki barasta hua sahab aaya

bana tasawwur-e-laila ba-surat-e-taswir

kabhi jo qais ki aankhon mein shab ko KHwab aaya

wo zud-ranj hai us ko na chheDna 'rana'

maloge hath agar bar-sar-e-itab aaya