چشم و ادا و غمزہ شوخی و ناز پانچوں

چشم و ادا و غمزہ شوخی و ناز پانچوں

دشمن ہیں میرے جی کے بندہ نواز پانچوں

کیا رنگ زرد و گریہ کیا ضعف و درد‌ و افغان

افشا کریں ہیں مل کر میرا یہ راز پانچوں

بار فراق سے ہے جوں شمع دل کو ہر شب

احراق و داغ و گریہ سوز و گداز پانچوں

آرام‌ و صبر و طاقت ہوش و حیا کہاں پھر

لے دل کے ساتھ یہ بھی اے عشوہ ساز پانچوں

فرہاد و قیس و وامق محمود و ماہ رو بھی

رکھ ہار مجھ پہ سوویں ہو پا دراز پانچوں

ہیں تیرے در پہ آ کر ہر ایک سر بہ سجدہ

لیلی و مہر و عذرا شیریں ایاز پانچوں

مت پوچھ کار انشاؔ ہجر و وصال میں کچھ

صبر و جنون و وحشت عجز و نیاز پانچوں