sab mera aab-e-rawan kis ke ishaaron pe baha jata hai

sab mirā āb-e-ravāñ kis ke ishāroñ pe bahā jaatā hai

aur ik shahr mire donoñ kināroñ pe basā jaatā hai

mauj meñ aate hī lag jaatī hai hoñThoñ pe badan kī miTTī

aur is zā.iqa-e-ġhair se sab merā mazā jaatā hai

ahl-e-īmāñ idhar ārā.ish-e-masjid meñ lage haiñ aur udhar

apnā sāmān uThā.e hue masjid se ḳhudā jaatā hai

koī mujh jaisā hī roz aatā hai āñkhoñ meñ liye sabza-e-dasht

ik harā ḳhat dar-o-dīvār ko detā hai chalā jaatā hai

chaltī hai aa.ine meñ kitne zamānoñ kī havā-e-hairat

ek rañg aatā hai chehre pe to ik rañg uḌā jaatā hai

merī ik umr aur ik ahd kī tārīḳh raqam hai jis par

kaise rokūñ ki vo aañsū mirī āñkhoñ se girā jaatā hai

chaak karnā hī garebāñ kā sikhāyā hai junūñ ne mujh ko

maiñ ne sīkhā hī nahīñ kaise garebāñ ko siyā jaatā hai

'farhat-ehsās' ne dekhā hai falak par kahīñ ik ḳhitta-e-ḳhvāb

bech Daalī hai tamām arz-e-badan us ne sunā jaatā hai

sab mera aab-e-rawan kis ke ishaaron pe baha jata hai

aur ek shahr mere donon kinaron pe basa jata hai

mauj mein aate hi lag jati hai honThon pe badan ki miTTi

aur is zaiqa-e-ghair se sab mera maza jata hai

ahl-e-iman idhar aaraish-e-masjid mein lage hain aur udhar

apna saman uThae hue masjid se KHuda jata hai

koi mujh jaisa hi roz aata hai aankhon mein liye sabza-e-dasht

ek hara KHat dar-o-diwar ko deta hai chala jata hai

chalti hai aaine mein kitne zamanon ki hawa-e-hairat

ek rang aata hai chehre pe to ek rang uDa jata hai

meri ek umr aur ek ahd ki tariKH raqam hai jis par

kaise rokun ki wo aansu meri aankhon se gira jata hai

chaak karna hi gareban ka sikhaya hai junun ne mujh ko

main ne sikha hi nahin kaise gareban ko siya jata hai

'farhat-ehsas' ne dekha hai falak par kahin ek KHitta-e-KHwab

bech Dali hai tamam arz-e-badan us ne suna jata hai