rang par kal tha abhi lala-e-gulshan kaisa

rañg par kal thā abhī lāla-e-gulshan kaisā

be-charāġh aaj hai har ek nasheman kaisā

dil-e-pur-dāġh jo hotā hai lahad meñ betāb

jhilmilātā hai charāġh-e-sar-e-madfan kaisā

maiñ kahīñ kā na rahā bād-e-ḳhizāñ ke chalte

uḌ gayā mere muqaddar se nasheman kaisā

ab ḳhudā jaane bahār aatī hai us meñ ki nahīñ

mere dam se kabhī ābād thā gulshan kaisā

chhup ke rātoñ ko kahīñ aap na aa.e na ga.e

be-sabab naam huā aap kā raushan kaisā

maal hāthoñ ne liyā hoñThoñ ne afshāñ chun lī

aa ke qaabū meñ luTā aap kā joban kaisā

ham ne dekhe haiñ maqāmāt-e-tajallī un ke

tuur kahte haiñ kise vādī-e-aiman kaisā

hai abhī mere buḌhāpe meñ javānī kaisī

hai abhī un kī javānī meñ laḌakpan kaisā

zab.h ke vaqt bahut saaf rahā thā ye to

de uThā ḳhuun dam-e-hashr ye dāman kaisā

to dharī jā.egī us ghar se jo niklī koī baat

nigah-e-shauq ye dīvār meñ rauzan kaisā

merī saj-dhaj to koī ishq-e-butāñ meñ dekhe

saath qashqe ke hai zunnār-e-barahman kaisā

aa.e haiñ daaġh nayā dene vo mujh ko pas-e-marg

aaj phailā hai ujālā sar-e-madfan kaisā

misī-mālīda lab-e-yār kī sun kar tārīf

muñh phulā.e hue hai ġhuncha-e-sausan kaisā

bāġhbāñ kaam hameñ kyā hai vo ujḌe ki rahe

jab hameñ baaġh se nikle to nasheman kaisā

pārsā ban ke 'riyāz' aa.e haiñ maiḳhāne meñ

aap baiThe haiñ bachā.e hue dāman kaisā

rang par kal tha abhi lala-e-gulshan kaisa

be-charagh aaj hai har ek nasheman kaisa

dil-e-pur-dagh jo hota hai lahad mein betab

jhilmilata hai charagh-e-sar-e-madfan kaisa

main kahin ka na raha baad-e-KHizan ke chalte

uD gaya mere muqaddar se nasheman kaisa

ab KHuda jaane bahaar aati hai us mein ki nahin

mere dam se kabhi aabaad tha gulshan kaisa

chhup ke raaton ko kahin aap na aae na gae

be-sabab nam hua aap ka raushan kaisa

mal hathon ne liya honThon ne afshan chun li

aa ke qabu mein luTa aap ka joban kaisa

hum ne dekhe hain maqamat-e-tajalli un ke

tur kahte hain kise wadi-e-aiman kaisa

hai abhi mere buDhape mein jawani kaisi

hai abhi un ki jawani mein laDakpan kaisa

zabh ke waqt bahut saf raha tha ye to

de uTha KHun dam-e-hashr ye daman kaisa

to dhari jaegi us ghar se jo nikli koi baat

nigah-e-shauq ye diwar mein rauzan kaisa

meri saj-dhaj to koi ishq-e-butan mein dekhe

sath qashqe ke hai zunnar-e-barahman kaisa

aae hain dagh naya dene wo mujh ko pas-e-marg

aaj phaila hai ujala sar-e-madfan kaisa

misi-malida lab-e-yar ki sun kar tarif

munh phulae hue hai ghuncha-e-sausan kaisa

baghban kaam hamein kya hai wo ujDe ki rahe

jab hamein bagh se nikle to nasheman kaisa

parsa ban ke 'riyaz' aae hain maiKHane mein

aap baiThe hain bachae hue daman kaisa