nazar aasuda-kaam-e-raushni hai

nazar āsūda-kām-e-raushnī hai

mire aage sarāb-e-āgahī hai

zamānoñ ko milā hai soz-e-iz.hār

vo saa.at jab ḳhamoshī bol uThī hai

hañsī sī ik lab-e-zauq-e-nazar par

shafaq-zār-e-tahayyur ban ga.ī hai

zamāne sabz o surḳh o zard guzre

zamīñ lekin vahī ḳhākistarī hai

pighaltā jā rahā hai saarā manzar

nazar tahlīl hotī jā rahī hai

dhuñdlakoñ ko añdhere chaaT leñge

ki aage ahd-e-marg-e-raushnī hai

bikharte kārvāñ ye irtiqā ke

sarāsīma sā zauq-e-zindagī hai

maiñ dekhūñ to dikhā dūñgā tumheñ 'sāz'

abhī mujh meñ basīrat kī kamī hai

nazar aasuda-kaam-e-raushni hai

mere aage sarab-e-agahi hai

zamanon ko mila hai soz-e-izhaar

wo saat jab KHamoshi bol uThi hai

hansi si ek lab-e-zauq-e-nazar par

shafaq-zar-e-tahayyur ban gai hai

zamane sabz o surKH o zard guzre

zamin lekin wahi KHakistari hai

pighalta ja raha hai sara manzar

nazar tahlil hoti ja rahi hai

dhundlakon ko andhere chaT lenge

ki aage ahd-e-marg-e-raushni hai

bikharte karwan ye irtiqa ke

sarasima sa zauq-e-zindagi hai

main dekhun to dikha dunga tumhein 'saz'

abhi mujh mein basirat ki kami hai