nahin chhupta tere itab ka rang

nahīñ chhuptā tire itaab kā rañg

ki badalne lagā naqāb kā rañg

phir gayā aañkh meñ sharāb kā rañg

zālim uf re tire shabāb kā rañg

ab to laale haiñ jān-e-muztar ke

aur hī kuchh hai iztirāb kā rañg

tere aate hī ho ga.ī paanī

uḌ gayā mohtasib sharāb kā rañg

rañg lā.egā dīda-e-pur-āb

dekhnā dīda-e-pur-āb kā rañg

dāġh-e-dāman ne bhī kiyā paidā

hashr ke roz āftāb kā rañg

shaiḳh jaanā tujhe mohabbat meñ

dekhtā jā mirī sharāb kā rañg

sadqe meñ apnī pārsā.ī ke

ki buḌhāpe meñ hai shabāb kā rañg

ḳhuun se jaise vāsta hī nahīñ

saaf hai ḳhanjar-e-pur-āb kā rañg

rīsh-e-vā.iz safed hai kitnī

nahīñ chaḌhtā kabhī ḳhizāb kā rañg

rañg kā us ke pūchhnā kyā hai

jis kā saaya bhī de gulāb kā rañg

sach hai ai hazrat-'riyāz' ye baat

ki judā sab se hai janāb kā rañg

nahin chhupta tere itab ka rang

ki badalne laga naqab ka rang

phir gaya aankh mein sharab ka rang

zalim uf re tere shabab ka rang

ab to lale hain jaan-e-muztar ke

aur hi kuchh hai iztirab ka rang

tere aate hi ho gai pani

uD gaya mohtasib sharab ka rang

rang laega dida-e-pur-ab

dekhna dida-e-pur-ab ka rang

dagh-e-daman ne bhi kiya paida

hashr ke roz aaftab ka rang

shaiKH jaana tujhe mohabbat mein

dekhta ja meri sharab ka rang

sadqe mein apni parsai ke

ki buDhape mein hai shabab ka rang

KHun se jaise wasta hi nahin

saf hai KHanjar-e-pur-ab ka rang

rish-e-waiz safed hai kitni

nahin chaDhta kabhi KHizab ka rang

rang ka us ke puchhna kya hai

jis ka saya bhi de gulab ka rang

sach hai ai hazrat-'riyaz' ye baat

ki juda sab se hai janab ka rang