mata-e-barg-o-samar wahi hai shabahat-e-rang-o-bu wahi hai

matā-e-barg-o-samar vahī hai shabāhat-e-rañg-o-bū vahī hai

khulā ki is baar bhī chaman par giraft-e-dast-e-numū vahī hai

hikāyat-e-ishq se bhī dil kā ilaaj mumkin nahīñ ki ab bhī

firāq kī talḳhiyāñ vahī haiñ visāl kī aarzū vahī hai

badal diye haiñ kisī ne afsūñ se kaam le kar tamām mohre

ki sehar-e-imroz ke muqābil na maiñ vahī huuñ na tū vahī hai

zamīñ pe bahtī huī ye āñkheñ falak pe rukte hue ye taare

sunā hai ye phuul haiñ usī ke sunā hai ye aabjū vahī hai

mah o sitāra to aa.ine ke vajūd se munharif hue haiñ

magar tirī chashm-e-mehrbāñ ko charāġh se guftugū vahī hai

ulajh rahā hai koī sitāra tilism-e-istaḳhr-o-nainvā se

ki rabb-e-''ra.a'' ke muqāble meñ huā hai jo surḳh-rū vahī hai

bahut girāñ hai mire shab-o-roz par ye rañg-e-visāl 'sājid'

magar vahī be-kalī hai dil kī dimāġh ko justujū vahī hai

mata-e-barg-o-samar wahi hai shabahat-e-rang-o-bu wahi hai

khula ki is bar bhi chaman par giraft-e-dast-e-numu wahi hai

hikayat-e-ishq se bhi dil ka ilaj mumkin nahin ki ab bhi

firaq ki talKHiyan wahi hain visal ki aarzu wahi hai

badal diye hain kisi ne afsun se kaam le kar tamam mohre

ki sehar-e-imroz ke muqabil na main wahi hun na tu wahi hai

zamin pe bahti hui ye aankhen falak pe rukte hue ye tare

suna hai ye phul hain usi ke suna hai ye aabju wahi hai

mah o sitara to aaine ke wajud se munharif hue hain

magar teri chashm-e-mehrban ko charagh se guftugu wahi hai

ulajh raha hai koi sitara tilism-e-istaKHr-o-nainwa se

ki rabb-e-ra ke muqable mein hua hai jo surKH-ru wahi hai

bahut giran hai mere shab-o-roz par ye rang-e-visal 'sajid'

magar wahi be-kali hai dil ki dimagh ko justuju wahi hai