makan dekhe makin dekhe la-makan dekha

makān dekhe makīñ dekhe lā-makāñ dekhā

kahāñ kahāñ tujhe DhūñDā kahāñ kahāñ dekhā

zarā jo ham ne unheñ aaj mehrbāñ dekhā

na ham se pūchhiye kyā rañg-e-āsmāñ dekhā

na pahuñche bām-e-qafas tak kabhī mire naale

vo barq hogī jise gard-e-āshiyāñ dekhā

jhukā jhukā hai to haañ gir paḌe mire sar par

yahī na yaas se thā sū-e-asmāñ dekhā

bahut se riñd bhī dekhe bahut se zāhid bhī

unheñ to piir hamesha inheñ javāñ dekhā

ab ārzūeñ bar aa.iiñ ki ḳhaak meñ mil jaa.eñ

ḳhudā ne din ye dikhāyā unheñ javāñ dekhā

ye jānte haiñ ki dil ḳhaak ho gayā jal kar

na aag dekhī na uThte hue dhuāñ dekhā

bahut hī ro.e gale mil ke ek ek se ham

luTā huā jo koī ham ne kārvāñ dekhā

qafas meñ roke sitam tere dekh leñ sayyād

chaman meñ rah ke bahut lutf-e-bāġhbāñ dekhā

'riyāz' ḳhāk-e-dar-e-mai-kada thā jīte-jī

fanā ke ba.ad use ḳhuld-āshiyāñ dekhā

makan dekhe makin dekhe la-makan dekha

kahan kahan tujhe DhunDa kahan kahan dekha

zara jo hum ne unhen aaj mehrban dekha

na hum se puchhiye kya rang-e-asman dekha

na pahunche baam-e-qafas tak kabhi mere nale

wo barq hogi jise gard-e-ashiyan dekha

jhuka jhuka hai to han gir paDe mere sar par

yahi na yas se tha su-e-asman dekha

bahut se rind bhi dekhe bahut se zahid bhi

unhen to pir hamesha inhen jawan dekha

ab aarzuen bar aain ki KHak mein mil jaen

KHuda ne din ye dikhaya unhen jawan dekha

ye jaante hain ki dil KHak ho gaya jal kar

na aag dekhi na uThte hue dhuan dekha

bahut hi roe gale mil ke ek ek se hum

luTa hua jo koi hum ne karwan dekha

qafas mein roke sitam tere dekh len sayyaad

chaman mein rah ke bahut lutf-e-baghban dekha

'riyaz' KHak-e-dar-e-mai-kada tha jite-ji

fana ke baad use KHuld-ashiyan dekha