husn marhun-e-josh-e-baada-e-naz

husn marhūn-e-josh-e-bāda-e-nāz

ishq minnat-kash-e-fusūn-e-niyāz

dil kā har taar larzish-e-paiham

jaañ kā har rishta vaqf-e-soz-o-gudāz

sozish-e-dard-e-dil kise ma.alūm

kaun jaane kisī ke ishq kā raaz

merī ḳhāmoshiyoñ meñ larzāñ hai

mere nāloñ kī gum-shuda āvāz

ho chukā ishq ab havas hī sahī

kyā kareñ farz hai adā-e-namāz

tū hai aur ik taġhāful-e-paiham

maiñ huuñ aur intizār-e-be-andāz

ḳhauf-e-nākāmī-e-umīd hai 'faiz'

varna dil toḌ de tilism-e-majāz

husn marhun-e-josh-e-baada-e-naz

ishq minnat-kash-e-fusun-e-niyaz

dil ka har tar larzish-e-paiham

jaan ka har rishta waqf-e-soz-o-gudaz

sozish-e-dard-e-dil kise malum

kaun jaane kisi ke ishq ka raaz

meri KHamoshiyon mein larzan hai

mere nalon ki gum-shuda aawaz

ho chuka ishq ab hawas hi sahi

kya karen farz hai ada-e-namaz

tu hai aur ek taghaful-e-paiham

main hun aur intizar-e-be-andaz

KHauf-e-nakaami-e-umid hai 'faiz'

warna dil toD de tilism-e-majaz