gumbad-e-madfan hai ya hai aasman baala-e-sar

gumbad-e-madfan hai yā hai āsmāñ bālā-e-sar

ye makīñ rakhte haiñ sab apne makāñ bālā-e-sar

yuuñ liye hoñ hashr meñ bār-e-garāñ bālā-e-sar

dosh par ḳhum hai gunah kī gaThriyāñ bālā-e-sar

chhoTī sī kashtī banā hai āsmāñ bālā-e-sar

sail-e-ashk is tarah chashm-e-ḳhūñ-fishāñ bālā-e-sar

zer-e-masjid mai-kada maiñ mai-kade meñ mast-e-ḳhvāb

chauñk uTThā jab dī mo.azzin ne azaañ bālā-e-sar

ham haiñ so.e sāya-e-gul meñ nahīñ itnā ḳhayāl

ai 'anādil is tarah shor-e-fuġhāñ bālā-e-sar

naḳhl-e-gul kī tarah dīvānoñ se bhī mānūs haiñ

lete haiñ bulbul jagah ai bāġhbāñ bālā-e-sar

ye nirālī terī ḳhilqat sham' us par husn bhī

ham ne dekhī ek terī hī zabāñ bālā-e-sar

ḳhush kiyā yuuñ baaġh meñ lā kar mujhe sayyād ne

shāḳh ke nīche qafas hai āshiyāñ bālā-e-sar

bechte phirte haiñ mai ham is tarah raste galī

jā-e-ḳhum chhoTī sī hai mai kī dukāñ bālā-e-sar

rahm kar mālik ki maiñ do do farishte bhī lade

aur phir 'isyāñ kā bhī bār-e-garāñ bālā-e-sar

pīchhe pīchhe kārvāñ ke ham thake-māñde haiñ yuuñ

paañv meñ chhāle haiñ gard-e-kārvāñ bālā-e-sar

paañv ke nīche se niklī jaatī hai yārab zamīñ

khā rahe haiñ chakkar itne āsmāñ bālā-e-sar

maiñ vo huuñ mahshar ke pyāsoñ ko pilā.ūñ to sahī

hauz-e-kausar hogā ai pīr-e-muġhāñ bālā-e-sar

ātish-e-rañg-e-hinā-o-zulf-e-pechāñ dekhiye

aag talvoñ meñ lagī niklā dhuāñ bālā-e-sar

lene jaatā hai haram se kyā kahīñ tum ko 'riyāz'

taaq par rakkhī hai botal mehrbāñ bālā-e-sar

gumbad-e-madfan hai ya hai aasman baala-e-sar

ye makin rakhte hain sab apne makan baala-e-sar

yun liye hon hashr mein bar-e-garan baala-e-sar

dosh par KHum hai gunah ki gaThriyan baala-e-sar

chhoTi si kashti bana hai aasman baala-e-sar

sail-e-ashk is tarah chashm-e-KHun-fishan baala-e-sar

zer-e-masjid mai-kada main mai-kade mein mast-e-KHwab

chaunk uTTha jab di moazzin ne azan baala-e-sar

hum hain soe saya-e-gul mein nahin itna KHayal

ai 'anadil is tarah shor-e-fughan baala-e-sar

naKHl-e-gul ki tarah diwanon se bhi manus hain

lete hain bulbul jagah ai baghban baala-e-sar

ye nirali teri KHilqat sham' us par husn bhi

hum ne dekhi ek teri hi zaban baala-e-sar

KHush kiya yun bagh mein la kar mujhe sayyaad ne

shaKH ke niche qafas hai aashiyan baala-e-sar

bechte phirte hain mai hum is tarah raste gali

ja-e-KHum chhoTi si hai mai ki dukan baala-e-sar

rahm kar malik ki main do do farishte bhi lade

aur phir 'isyan ka bhi bar-e-garan baala-e-sar

pichhe pichhe karwan ke hum thake-mande hain yun

panw mein chhaale hain gard-e-karwan baala-e-sar

panw ke niche se nikli jati hai yarab zamin

kha rahe hain chakkar itne aasman baala-e-sar

main wo hun mahshar ke pyason ko pilaun to sahi

hauz-e-kausar hoga ai pir-e-mughan baala-e-sar

aatish-e-rang-e-hina-o-zulf-e-pechan dekhiye

aag talwon mein lagi nikla dhuan baala-e-sar

lene jata hai haram se kya kahin tum ko 'riyaz'

taq par rakkhi hai botal mehrban baala-e-sar