tere baghair masafat ka gham kahan kam hai

tire baġhair masāfat kā ġham kahāñ kam hai

magar ye dukh ki mirī umr-e-rā.egāñ kam hai

mirī nigāh kī vus.at bhī is meñ shāmil kar

mirī zamīn pe terā ye āsmāñ kam hai

tujhe ḳhabar bhī kahāñ hai mire irādoñ kī

tū merī sochtī āñkhoñ kā rāz-dāñ kam hai

isī se ho ga.e mānūs tā.irān-e-chaman

vo jo ki baaġh kā dushman hai bāġhbāñ kam hai

agarche shahr meñ phailī kahāniyāñ haiñ bahut

koī bhī sunñe-sunāne ko dāstāñ kam hai

nigāh o dil pe khulī haiñ haqīqateñ kaisī

ye dil udaas ziyāda hai shādmāñ kam hai

ab is se baḌh ke bhī koī hai pul-sirāt abhī

maiñ jī rahā huuñ yahāñ jaise imtihāñ kam hai

tere baghair masafat ka gham kahan kam hai

magar ye dukh ki meri umr-e-raegan kam hai

meri nigah ki wusat bhi is mein shamil kar

meri zamin pe tera ye aasman kam hai

tujhe KHabar bhi kahan hai mere iradon ki

tu meri sochti aankhon ka raaz-dan kam hai

isi se ho gae manus tairan-e-chaman

wo jo ki bagh ka dushman hai baghban kam hai

agarche shahr mein phaili kahaniyan hain bahut

koi bhi sunne-sunane ko dastan kam hai

nigah o dil pe khuli hain haqiqaten kaisi

ye dil udas ziyaada hai shadman kam hai

ab is se baDh ke bhi koi hai pul-siraat abhi

main ji raha hun yahan jaise imtihan kam hai